Месяца октября в 4-й день
Всех святых, в земли Казанстей просиявших
На малой вечерни
Поем службу святым Гурию и Варсонофию ради обретения их честных мощей.
На Господи, воззвах: стихиры святых, глас 1.
Подобен: Небесных чинов:
Взясте на рамо крест Христов,/ и распястеся миру, преподобнии,/ и последовасте стопам создавшаго от не сущих вся, Божия Слова./ Егоже молите, да приимем грехов прощение,/ и наследницы будем жизни вечныя.
Явистеся сокровище добродетелей,/ и презресте вся яже в житии красная,/ Христовою любовию распалаеми,/ ищуще яже Богу угодная./ И Того ради бысте жителе Царства Небеснаго, и о нас молите,/ да будем и мы тому сопричастницы.
Безстрастия бывше краснии сосуди, отцы преблаженнии,/ и чудес источницы,/ монашествующих столпи крепцыи, демонов прогонителе/ и страстей целителе,/ да почтутся песньми,/ наставницы наши премудрии:/ и молят Христа да спасет души наша.
Слава, глас 6:
Кто доволен похвалити таковыя святители,/ возсиявшыя напоследок лет;/ благодатию бо Святаго Духа,/ чудес исцелений дар приемше от Бога,/ и своих телес нетление,/ нам же у Христа просят грехов прощения/ и велия милости.
И ныне, Богородичен, глас тойже:
Мати Божия Пречистая,/ образ Свой, яко дар пресвят земли Казанстей давшая/ и тем многих исповедников Сына и Бога Твоего укрепившая,/ Заступнице Усердная, люди Твоя не остави.
На стиховне стихиры, глас 2.
Подобен: Доме Евфрафов:
Земле Русская,/ граде святый,/ украшай твой дом,/ в немже Божественный/ велий сонм святых прослави.
Стих: Господи, Господь наш,/ яко чудно Имя Твое по всей земли.
Земле Русская,/ красуйся и ликуй,/ се бо чада твоя/ Престолу Владычню/ во славе предстоят, радующеся.
Стих: Святым, иже суть на земли Его,/ удиви Господь вся хотения Своя в них.
Соборе святых русских,/ полче Божественный,/ молитеся ко Господу/ о земном отечестве вашем/ и о почитающих вас любовию.
Слава, глас и подобен тойже:
Новый доме Евфрафов,/ уделе избранный,/ Русь Святая,/ храни веру Православную,/ нейже тебе утверждение.
И ныне, Богородичен, глас тойже:
Аще и горение велие града Казани/ яви нам зрак лика Твоего, Дево Пречистая,/ обаче Заступница Усердная земли нашея явилася еси,/ Мати Божия, христиан похвало.
Тропарь святых, глас 4: Днесь, яко солнце пресветлое:писан на велицей вечерни
На велицей вечерни
Блажен муж:1-й антифон. На Господи, воззвах: стихиры святых на 8, глас 1:
Подобен: О, дивное чудо:
О, дивное чудо!/ Велие торжество явися земли нашей:/ собор святых прославляется,/ и предстателие ко Христу сии бывают./ Веселися, граде Казанский,/ имея в себе лучи сияющия, святыя твоя./ Возопиим, вернии:/ радуйтеся, заступницы наши,/ вы бо молите спастися верою вас почитающим.
Твое славим торжество, святителю Гурие,/ свещами златозарными град твой украшается/ и песньми духовными днесь исполняется./ Радуются людие земли Казанския,/ воспевающе днесь собор святых своих/ и, светолепно праздник совершающе,/ со архангелы и ангелы ликовствуют:/ радуйтеся, заступницы наши,/ похвало и утверждение,/ молитеся за ны, спастися душам нашим.
Дивны Твоя тайны, Богородице,/ явилася eси, Владычице, во граде нашем/ и образом Твоим радость возсия нам./ Припадают Тебе ныне наши сродницы:/ святителие, преподобнии и праведнии,/ исповедницы и мученицы./ Возвеселимся, вернии, днесь и воспоим:/ радуйся Заступнице наша, христианом Похвало и Утверждение,/ молися за ны спастися душам нашим.
Ины стихиры, глас 2.
Подобен: Киими похвальными:
Киими похвальными венцы/ восхвалим земли Казанския первыя просветители/ предивныя Гурия, Варсонофия и Германа,/ предстатели и заступники наши,/ семена спасительнаго учения сеятели равноапостольныя/ Христова Евангелия путеводцы истинныя?/ Ихже ради прежде темный град озарися светом богопознания/ и Христос прославися,/ имеяй велию милость.
Киими песенными пении/ похвалим святителей и мучеников земли нашея/ Ермогена, Патриарха Российскаго,/ Кирилла, Анатолия, Иоасафа и Амвросия?/ Исповедники веры Православныя,/ архиерейства жезлы добрыя преизящныя,/ мучеников крепкия поборники,/ яко житием своим верность Христу показаша,/ имеющему велию милость.
Киими похвальными венцы/ увязем мученики наша/ Авраамия, Иоанна, Стефана и Петра?/ Прежде просвещения града Казани первыя лучи,/ четверица мученическая преславная,/ Небеснаго Царствия доблии гражданы,/ ихже в Своя обители Христос прият,/ имеяй велию милость.
Киими песненными добротами/ воспоим новомученики и исповедники наша,/ Димитрия, Филарета, Михаила и Павла,/ во священницех Христу потрудившияся,/ таже преподобномученики преславныя/ во обителех подвизавшияся?/ Благоуханнии цвети вертограда Небеснаго,/ ихже насади Христос Бог наш,/ имеяй велию милость.
Киими духовными песньми/ похвалим Гавриила и Александра?/ Служители Господни изрядныя,/ монахом наставники и ангелом собеседники,/ во бранех духовных человеком поборники,/ града Казани светлая удобрения,/ Пастыреначальника Христа подражатели,/ подающего нам велию милость.
Слава, глас 8:
Да прославится днесь собор святых,/ в земли Казанстей Богу угодивших:/ славнии святителие и просветителие,/ таже священномученицы и исповедницы,/ кровь свою за Христа излившии,/ еще же преподобнии и праведнии,/ именованнии и неименованнии,/ покровом Матере Божия, Заступницы Усердныя/ в земли сей утвержденнии.
И ныне, Богородичен, глас 8: Царь Небесный:
Вход. Прокимен дне. И чтения три:
Пророчества Исаиина чтение
(Гл. 43, ст. 9-14):
Тако глаголет Господь: вси языцы собрашася вкупе, и соберутся князи от них. Кто возвестит сия в них? Или, яже от начала, кто слышана сотворит вам? Да приведут свидетели своя, и оправдятся, и да услышат, и да рекут истину. Будите Ми свидетели, и Аз Свидетель, глаголет Господь Бог, и отрок, егоже избрах. Да познаете, и веруете Ми, и разумеете, яко Аз есмь, прежде Мене не бысть ин бог, и по Мне не будет. Аз есмь Бог, и несть, разве Мене, спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь, и несть от рук Моих избавляяй. Сотворю, и кто отвратит то? Сице глаголет Господь Бог, избавляяй вас, Святый Израилев.
Премудрости Соломоновы чтение
(Гл. 3, ст. 1-9):
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие — сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение
(Гл. 5 ст.15 – гл. 6, ст. 3 ):
Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение Свое и вооружит тварь в месть врагом. Облечется в броня правды и возложит шлем — суд нелицемерен. Приимет щит непобедимый — преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят, и от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащия множества и гордящияся о народех язык. Яко дана есть от Господа держава вам и сила от Вышняго.
На литии стихиры, глас 2:
Припадем с любовию к преславным святителем Господним/ Гурию, Варсонофию и Герману,/ первым просветителем земли Казанския,/ таже воспоим пречуднаго Ермогена,/ святителя, исповедника и Патриарха Российскаго.
Помолимся усердно страстотерпцем Казанским,/ святым мучеником Авраамию, Иоанну, Стефану и Петру,/ имя Христово дерзновенно исповедавшим,/ таже воспоим собор новомученик и исповедник,/ кровию своею землю оросившия/ и заступники наши усердныя явльшияся.
Воспоим и почудимся подвигом же, слезам и молитвам,/ яже преподобнии отцы Казанстии,/ Гавриил и Александр преславнии,/ с преподобными отцы Зилантовыя и Раифския обители Богу принесоша,/ таже плод духовный в земли сей возрастиша.
Слава, глас 6:
Собор святых земли Казанския усердно взывает ко Господу,/ да сохранит и избавит Спас мира Христос народ православный,/ во всех концех вселенныя,/ молитву о спасении приносящих.
И ныне, Богородичен, глас тойже:
Прославим, верни, обрадованную Богородицу,/ се бо во устех наших имамы всегда святое и благословенное имя Ея,/ непрестанно прибегающе к пречистей Ея и цельбоносней иконе:/ Тою бо обретаем, яже на земли вся благая и полезная,/ и сущих на воздусе от демонов запинаний избавляемся,/ яко Мати рождшая всех Творца,/ спасает от бед души наша.
Молитвы на литии:
Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя: молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных Небесных Сил безплотных: честнаго славнаго Пророка, Предтечи и Крестителя Иоанна: святых славных и всехвальных апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николая, архиепископа Мир Ликийских, Чудотворца: святых равноапостольных Мефодия и Кирилла, учителей Словенских, святых равноапостольных великаго князя Владимира и великия княгини Ольги: иже во святых отец наших, святителя Михаила, перваго митрополита Киевскаго, первосвятителей Московских и всея Руси, Петра, Алексия, Ионы, Макария, Филиппа, Иова и Тихона, святых, в земли Казанстей просиявших:
Святителей Гурия, Варсонофия и Германа Казанских чудотворцев, Филарета, митрополита Киевскаго, святых священномучеников: Ермогена, Патриарха Московскаго и всея Руси чудотворца, Кирилла, митрополита Казанскаго, Анатолия, митрополита Одесскаго, Иоасафа, епископа Чистопольскаго, Амвросия, епископа Свияжскаго, Алексия, архиепископа Омскаго, Никиты, епископа Орехово-Зуевскаго, Димитрия и Филарета, пресвитеров Казанских, Михаила, пресвитера Чистопольскаго, Павла, пресвитера Елабужскаго, преподобных и богоносных отец наших: Макария Желтоводскаго, Свияжскаго чудотворца и Гавриила, старца Седмиезернаго, святых преподобномучеников Зилантовых: Сергия, Лаврентия, Серафима, Феодосия, Леонтия, Стефана, Георгия, Сергия, Илариона и Иоанна, преподобномучеников Раифских: Иосифа, Сергия, Антония, Варлаама, Иова и Петра, святыя преподобномученицы Маргариты, игумении Мензелинския, преподобноисповедника Александра Седмиезернаго, святых славных и добропобедных мучеников Авраамия Болгарскаго, Иоанна, Стефана и Петра Казанских, святых благоверных князей Феодора, Давида и Константина Ярославских чудотворцев, и всех прочих святых, в земли Казанстей просиявших, ихже имена Ты Сам, Господи, веси, ихже и память ныне совершаем, святых праведных Богоотец Иоакима и Анны и всех святых, молим Тя, Многомилостиве Господи, услыши нас грешных, молящихся Тебе, и помилуй нас.
Владыко Многомилостиве, Господи, Иисусе Христе, Боже наш, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных Сил безплотных, честнаго славнаго Пророка, Предтечи и Крестителя Иоанна, святых славных и всехвальных апостол, святых славных и добропобедных мучеников, преподобных и богоносных отец наших и всех святых, в земли Казанстей просиявших, ихже и память ныне совершаем, святых праведных Богоотец Иоакима и Анны и всех святых Твоих, благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата, умири нашу жизнь, Господи, помилуй нас и мир Твой, и спаси души наша, яко Благ и Человеколюбец.
На стиховне стихиры, глас 5.
Подобен: Радуйся:
Радуйтеся, древнии святителие,/ святии сродницы наши,/ цвети духовнии земли Казанския,/ похвало наша и утверждение,/ тихое пристанище,/ сокровище церковное,/ стопы и словеса апостольская,/ жития же ваша и многая чудеса/ прославляют прославльшаго вас Господа,/ Егоже прилежно молите/ даровати душам нашим велию милость.
Стих: Честна пред Господем/ смерть преподобных Его.
Радуйтеся, светильницы многосветлии,/ священномученицы архипастыри и пастыри наша,/ врачеве духовнии,/ недугующим отрада и скорбящим утешение,/ обуреваемым пристанище немятежное,/ столпи церковнии, верных утверждение,/ за ны Христа Бога молите,/ даровати нам велию милость.
Стих: Блажен муж, бояйся Господа,/ в заповедех Его восхощет зело.
Радуйтеся, преподобнии отцы,/ заступницы наши и хранителие,/ Духа Святаго сосуди избраннии,/ земли Казанския утверждение/ благочестия столпи непоколебимии,/ правило веры и образ благочестия./ Вы бо новыя исповедницы и мученицы,/ кровьми вашими землю нашу озаряете,/ подвиги вашими обители освящаете./ Темже священную вашу память совершающим,/ Христа Бога молите/ даровати душам нашим велию милость.
Слава, глас 6:
Иже прежде темный,/ ныне же просвещенный град Казань радуется,/ имея в себе святыя заступники своя,/ лучезарныя молнии Господни,/ имиже агарянская лесть разрушися/ и сей край восточный земли Русския просветися,/ мнози святии Господни тогда явишася,/ славу Церкве Христовы возвещающии.
И ныне, Богородичен, глас тойже:
Да радуется обитель Твоя, Богородице,/ водное естество седми езер да ликовствует днесь,/ яко Твоего, Чистая, честнаго образа пришествием град наш спасается,/ раби Твои болезней исцеление приемлют/ и к Тебе, Чистая, взывают:/ радуйся, врачевство наше неоскудное,/ горьких недуг избавляющее,/ радуйся, скорбящим Божественное веселие,/ и Живоносный Источниче святыни,/ радуйся, многосветлая Звездо,/ иконою Твоею нас озаряющая,/ радуйся, основание Кизическия обители,/ Тобою бо, Всечистая хвалимся и в нуждах прибегаем.
На благословении хлебов тропарь святых, глас 4 дважды:
Днесь, яко солнце пресветлое,/ возсия земля Казанская,/ в ней бо память собора святых ея совершается/ и Церковь псалмы и песньми духовными украшается,/ прославляющи святители и благовестники своя,/ мученики, исповедники и чудотворцы,/ преподобныя мужи и жены,/ праведныя и вся святыя,/ иже, купно во славе вечней предстоят/ и с Заступницею Усердною молятся Христу Богу// спастися людем своим.
Вместо Богородице Дево: поем тропарь сей единожды:
Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися/ в державный Твой покров прибегающим./ Всех нас заступи, о Госпоже Царице и Владычице,/ иже в напастех и в скорбех, и в болезнех, обремененных грехи многими,/ предстоящих и молящихся Тебе умиленною душею и сокрушенным сердцем,/ пред пречистым Твоим образом со слезами/ и невозвратно надежду имущих на Тя,/ избавления всех зол,/ всем полезная даруй/ и вся спаси, Богородице Дево:/ Ты бо еси Божественный Покров рабом Твоим.
На утрени
На Бог Господь: тропарь святых, глас 4: Днесь яко солнце пресветлое: дважды. Слава и ныне: Заступнице усердная:
По 1-м стихословии седален, глас 3.
Подобен: Дева днесь:
Днесь Церкве Русския торжество и града нашего веселие,/ се бо паства Казанская святыми своими, яко златом нетленным, хвалится/ и памятию их благоухает./ Тии бо, во славе Царствия Небеснаго пребывающе,/ за ны молят Всемилостиваго Бога,/ да подаст мирови велию милость.
Слава, ин седален, глас 5:
Яко солнце светозарное,/ возсия днесь память твоя, святителю и исповедниче Кирилле,/ лучами озаряющи верных сердца,/ к прославлению дивнаго во святых Своих Бога,/ даровавшаго тебе крепость во исповедании и терпение в скорбех,/ не премолчи о нас, угодниче Христов,/ и избави нас от всякаго зла,/ Церковь Русскую сохрани от раздоров и нестроений,/ мир мирови испроси/ и душам нашим велию милость.
И ныне, Богородичен, глас 4:
Днесь светло красуется Раифская пустынь,/ яко зарю солнечную, от востока возсиявшую, восприимши, Владычице,/ чудотворную Твою икону,/ еюже разгоняеши мглу искушений и бед от вопиющих верно:/ избави обитель нашу и вся страны христианския от всех навет вражиих/ и спаси души наша,/ яко Милосердная Заступница рода христианскаго.
По 2-м стихословии седален, глас 1.
Подобен: Гроб Твой:
Приидите, вси вернии, святителя Ермогена восхвалим,/ звезду, от града нашего возсиявшую/ и всю землю Русскую Православием веры озарившую,/ и ныне звезду нову на славных небесех в сонме священномученик явленную,/ в помощь Церкви и отечеству противу врагов наших/ и во утверждение веры отцев наших:/ Господи, молитвами святителя, мир Твой подаждь нам/ и велию милость.
Слава, ин седален, глас 5.
Подобен: Радуйся:
Иоасафе, священномучениче Христов,/ твердый и мужественный исповедниче,/ святителя Кирилла сподвижниче,/ земли Казанския похвало,/ пастырю добрый, положивый душу за паству свою,/ моли Христа Бога,/ яко да милостив нам будет в День Судный.
И ныне, Богородичен, глас тойже:
Кий дар принесем Ти, Пречистая?/ Кия достодолжныя песни воспоим пред святыми Твоими иконами,/ Заступнице наша и Мати Всеблаженная?/ Аще и град Твой не оставляеши,/ егда нечестивии людие, образ Твой не почетше,/ расхитиша обитель Твою и лика Твоего цела не оставиша,/ тогда не токмо люди града нашего,/ но вся христианы восплакашася и возрыдашася./ Ты же чрез святителя Константина града утешение дарова нам,/ новое торжество нам являющи,/ мы же, любовию чтуще честную икону Твою,/ Тебе песнословим вси в радости:/ радуйся, Дево Честная, Всеблаженная.
Величание:
Величаем вас,/ вси святии, в земли нашей просиявшии,/ и чтим святую память вашу,/ вы бо молите о нас/ Христа, Бога нашего.
Псалом избранный:
1. Вси языцы восплещите руками, воскликните Богу гласом радования.
2. Князи людстии собрашася с Богом Авраамлим, яко Божии державнии земли зело вознесошася.
1. Велий Господь, и хвален зело, во граде Бога нашего, в горе святей Его.
2. Речная устремления веселят град Божий, освятил есть селение Свое Вышний.
1. Господи, кто обитает в жилищи Твоем? Или кто вселится во святую гору Твою?
2. Ходяй непорочен и делаяй правду, глаголяй истину в сердце своем.
Посем: Слава, и ныне: Аллилуиа (трижды). И паки поем величание.
По полиелее седален, глас 5:
Красуйся, светися, земле Казанская,/ яко имаши в себе святыя своя,/ основание твердое веры Православныя,/ камень краеугольный и луч светлый Евангелия Божественнаго/ собор святых сродник наших бысть,/ ихже любовию почитаем.
Слава, глас 6:
Иже прeжде неверием помрачeнный,/ ныне же верою ко Христу просвещeнный,/ преславный грaд Казaнь вaми хвaлится,/ имея в себе мощи ваша нетленныя,/ троице честная, Гурие, Германе и Варсонофие,/ отцы наши преподобнии,/ вы бо с верою приходящим источaете чудеса/ и подаeте неоскyдно исцелeния/ любовию святyю вaшу пaмять почитaющим.
И ныне, Богородичен, глас 8:
Приидите, возрадуемся Державней Заступнице рода нашего, Царице Богородице./ Приидите, к тихому Ея и чудному, почитаемому ангелы, честному поклонимся образу,/ дарует бо верным обильныя дары целебныя,/ от неистощимаго источника святыя иконы неоскудную благодать источающи;/ тьмы избавляет нас искушений и бед, и всякаго греха,/ благочестно и богоприятно прославляющих и чтущих светлую и чудную Богоматере святую икону./ Тем, воспевающе, воззовем Первообразней:/ радуйся любезная миру помоще,/ во спасение душ наших.
Степенны, 1-й антифон 4-го гласа. Прокимен, глас 4: Радуйтеся, праведнии, о Господе, правым подобает похвала. Стих: Буди, Господи, милость Твоя на нас, якоже уповахом на Тя. Всякое дыхание: Евангелие от Матфея, зачало 10.
По 50-м псалме стихира, глас 6:
Соберемся, людие,/ милостивое смотрение Божие восславити,/ изволи бо Господь наш землю Казанскую просветити;/ темже подвижников Христовых прославим:/ святителей чудных,/ мучеников древних,/ таже новомучеников и исповедников преславных,/ преподобных, и праведных, и всех святых,/ край сей освятивших помощию Господа нашего/ и благодатию Его.
Канон Богородице со ирмосом на 6, глас 8: Колесницегонителя фараона: из Октоиха. Канон святым на 8, глас 5, егоже краегранесие: Сродник своих память пою.
Песнь 1
Ирмос: Величаваго фараона в мори потопивша со оружием и всадники,/ Израиля же преславно спасша/ и по суху проведша,// поем Христа, яко прославися.
Припев: Вси святии земли нашея, молите Бога о нас.
Песньми благовосхвалити хотящу пaмять вашу,/ блажeннии сродницы наши,/ светоносную ми зарю, святии, с Небесе низпослите.
Святии вси, иже землю Казанскую прежде ея просвещения именем Христовым освятивше,/ святителие Христовы и исповедницы,/ ихже достойно исчислити не можем,/ молитву вашу сотворите о братиях ваших страждущих, молим вы.
Величие наше и похвала ты еси, Гурие первый архипастырю наш:/ тобою бо многия неверныя ко Христу обратишася./ Ныне молися за род и роды, ихже Богу привел еси,// поющи Его, яко прославися.
Первый сеятель был еси духовных добродетелей,/ и первый пастырь, и Церкви начальник,/ первый архиерей и учитель христианскому закону в новопросвещеннем граде Казани, явился еси,/ Гурие равноапостольне.
Храм первопрестолен Богородичен явися во граде нашем/ труды твоими, Гурие, / Благовещению Пречистыя посвящая,/ идеже и мощи твоя положени суть,/ доныне чудеса источают.
Песньми и пении духовными восхвалим святителя Гурия/ и, припадающе к честней и многоцелебней раце его,/ с любовию облобызаем ю и сице воспоем:/ радуйся, мироточце наш, молитвенниче о граде твоем неусыпный.
Богородичен: Днесь радость Благовещения во граде нашем бывает,/ егда новый Гавриил божественный Гурий Евангелие Христово благовествует/ и церковь престольную в честь Пречистыя нам устрояет,/ безсеменное Рождество от Девы Чистыя со Архангелом воспоим:// радуйся Благодатная, Господь с Тобою.
Катавасия: Отверзу уста моя:
Песнь 3
Ирмос: Державною рукою и сильным словом небо и землю сотворил еси,/ юже Твоею Кровию искупил еси, Церковь Твою,/ яже о Тебе утверждается, зовущи:/ яко несть свят, разве Тебе, Господи.
Державною рукою, и мудрыми словесы,/ и сильным словом учил еси,/ преславный Варсонофие,/ первый просветителю града Казани,/ монах предивный по избытии плена агарянского явился еси,/ таже отцем иноков содеявся,/ моли спастися душам нашим.
Святителю Варсонофие преподобне,/ первый устроитель жития монашескаго во граде Казани явился еси/ и, красну обитель Спасова Преображения воздвигнув,/ в законех жизни духовныя чадом твоим преславно светил еси.
Край Казанский солию учения Христова просветил еси,/ святителю Германе,/ таже во граде Свияжсце обитель Богоматери создав,/ добр учитель явился еси, святе.
Престол Казанский по святем Гурии наследовав,/ добр пастырь и просветитель людем новым явился еси,/ святе Германе премудре,/ таже, храмы Божия в земли Казанстей умножив,/ на высшее служение восхищен был еси.
Радуйся, святителю Филарете,/ не токмо Киеву граду, но и зде мног плод принесл еси,/ просветителю языков, устроителю храмов, алчущих питателю,/ Гурия, Германа и Варсонофия святых ревностный почитателю/ и к Богу за люди молитвенниче.
О, троице равноапостольная всечестная,/ древнии наши учителие и первии архипастырие,/ Гурие, Варсонофие и Германе со святителем Филаретом/ и прочиими святыми земли нашея ныне прославляетеся.
Богородичен: Пречистая Твоя икона, Богородице Дево,/ врачевство всему миру духовное:/ к нейже прибегающе,/ Тебе покланяемся, и почитаем, и лобызаем, и чтим,/ исцелений благодать почерпающе от нея,/ и недуг телесных, и душевных страстей,/ Твоими молитвами свобождаемся.
Катавасия: Твоя песнословцы:
Седален святых, глас 8:
Приидите, казанстии людие,/ принесите ныне пение и моление своему первосвятителю/ и воспойте ему красное от души хваление:/ той бо начаток бысть проповеди Божественныя агаряном,/ просветитель во тьме седяшим,/ заблуждшим наставник и руководитель ко спасению,/ многия привед ко Христу Богу./ Емуже аще и выну на Небесех предстоит,/ обаче и земная посещает,/ и на праздник свой от Горних приходит,/ и возвеселяет собранныя люди своя,/ зрит покланяющияся святому образу Его/ и слышит молитвы молящихся/ и приносит я ко Владыце./ Единогласно убо воззовем к нему:/ о великий отче наш, святителю Гурие,/ никогдаже остави нас, чад твоих,/ но посещай всегда милостию твоею/ и молитвами твоими соблюдай нас,/ буди с нами, и никтоже на ны.
Слава, ин седален, глас 6:
Ни святитель быв, ни мученик земли нашея,/ ни пророк и ни апостол,/ но храмы наша именем твоим хвалятся,/ святе праведне Иоанне, пастырю Кронштадтский,/ стопы своими, освящая волжский путь/ и словесных овец научая,/ до града нашего достигл еси,/ цевнице духовная, проповедниче покаяния,/ служителю Божественных Таин благоговейный.
И ныне, Богородичен, глас тойже:
Людие благочестивии,/ правовернии собори христоименитии,/ приступите верно вси,/ божественному припадающе Божия Матере образу:/ Тая бо исцеление болящим радостно подает,/ уязвляет же злославныя, яко стрела от лука,/ нас всех веселит световидно/ и благодатию озаряет молитвами Своими.
Песнь 4
Ирмос: Духом Божиим очищся пророк, дыхающим в нем,/ Аввакум божественный, бояся, глаголаше:/ внегда приближатся лета, познан будеши, Боже,/ на спасение человеков.
Дух Божий почи на тебе,/ яко на пророцех древле, святителю Ермогене досточудне,/ первоиерарше Церкве Российския,/ таже залог спасения ея и всего отечества,/ егда брань тяжкая постиже землю нашу,/ первый положил еси молитвы, слезы и прещения твоя,/ избавителю от врагов готовейший.
Икону явльшуюся Пресвятыя Богородицы Заступницы Усердныя/ на длани своя приял еси, святителю Ермогене,/ первое же пение молебное пред нею сотворил еси,/ темже тя ублажаем, преславне.
Сигор ли гору наречем тя, Ермогене?/ Егда спасается и угонзает страна Российская от неправд и беззаконий и многих нестроений,/ тогда буди советник мудрый и предстатель о нас,/ отрасле Казанская.
Патриарха Тихона споспешниче,/ Петра крепчайшаго сострадальче,/ звезда путеводна Церкви Русстей явился еси,/ с сими ныне Небесныя славы наслаждаешися/ Христов мучениче, Кирилле святителю.
Страдания многая претерпел еси, отче Кирилле,/ клеветы, суды, заточения,/ предательства лжебратий и угрозы смертныя,/ таже насильства и нападения врагов Церкве Христовы,/ новомучениче земли Русския.
Твое крестоносное в вере стояние/ от смуты и раскола Церковь Русскую спасло есть./ Имя твое бысть образ победы духовныя,/ юже соверши единство святых мученик,/ тобою хвалится земля Казанская,/ прехвальне Кирилле, отче наш.
Богородичен: С чинми ангел, Владычице,/ со пророки, и апостолы, и со всеми святыми/ за ны, грешныя, Богу помолися,// Твоего Покрова праздник в Церкви Русстей прославльшия.
Катавасия: Седяй в славе:
Песнь 5
Ирмос: Слово Божие Всесильное,/ мир всему миру посли/ и светом истинным освещая и просвещая вся,/ из нощи Тя славящия.
Добрый учителю вертограда духовнаго/ светлаго и богопросвещеннаго града Казани,/ верный возвестителю пути спасительнаго,/ истинный хранителю апостольских преданий,/ столпе непоколебимый,/ страдальче за Христа предивный,/ священномучениче Анатолие, явился еси.
Никтоже возможе отлучити тя от любве Божия, славный Иоасафе,/ егда же Господь в годину лютую гонений на Церковь Божию/ призва тя к служению святительскому,/ мужественный защититель паствы своея был еси.
Иоасафе, Чистопольская похвало и адаманте нашея Церкве,/ преемниче Анатолия славнаго,/ споспешниче Кирилла богомудраго,/ с обоими бо ныне в чертозех Божиих предстоиши/ и молитвенник о пастве своей являешися.
Стецемся во обитель Свияжскую,/ идеже подвигом добрым подвизася святитель Амвросий,/ и честную его икону обстояще, воззовем:/ радуйся, страдальче неодоленный,/ радуйся, обители твоей щит и ограждение,// радуйся, небесный сродниче наш.
Кто воспоет твоя подвиги, Амвросие отче наш,/ наставник явился еси многим,/ апостол и учитель явился еси земли Корейския,/ и земля Казанская тобою хвалится,/ светильниче Елабужский и Сарапульская славо,/ молитвенный покров ныне сим градом бывая.
Многия святыя израсти земля наша,/ земли Русския предстателей ко Христу дарова,/ с сими прославим святителей и мучеников единокровных/ Алексия, Никиту, славных Бугульминских архипастырей.
Богородичен: Во Успении Твоем нас не оставляеши,/ во обителех древних земли нашея монаси пения гробу Твоему приносят,/ Пренепорочная Мати.
Катавасия: Ужасошася всяческая:
Песнь 6
Ирмос: В Церковь небесную святую Твою да приидет молитва моя,/ вопию Ти, яко Иона, из глубины сердца морскаго:/ от грех моих возведи мя,// молюся Тебе, Господи.
Кия песни принесем священномучеником нашим во пресвитерех Богу послуживших?/ Иже страдания мужественне претерпеша,/ венцы Небесныя стяжаша:/ Темже любовию память сих светло торжествуем.
Небоязненно стал еси в защиту веры Православныя, священне Димитрие,/ и, не устрашився сильных мира сего,/ исповедал еси истину Божию даже до крове.
Служитель неленостный явился еси, отче Филарете,/ в вертограде духовнем служа,/ овцы словесных окормляя, пастырски работав,/ темже мученически за Христа пострадал еси.
Пастырское служение в Чистопольских пределех добре совершая/ и ревностию о Бозе распалаяся,/ верныя небоязненно исповедати веру во Святую Троицу призывал еси/ и смерть мужественне сретил еси, отче Михаиле.
Душегубцы пагубнии кровь твою пролиша,/ ты же за Христа достойно смерть приял еси,/ древним мучеником подобяся, Павле, отче наш,/ со чады твоими мученических венцев удостоился еси,/ Елабужская красото.
В пределех Марийских новомученицы явистася/ пастырие и усерднии к Богу молитвенницы,/ Адриане и Михаиле честнии,/ сего ради и за веру Христову убиение прияли есте.
Богородичен: Сын убо Твой, Всечистая,/ даровал есть верным Божественнаго лика Своего нерукотворенное изображение,/ Ты же, Дево Всеблаженная,/ мирови честную Твою икону оставила еси.
Катавасия: Божественное сие и всечестное:
Кондак святых, глас 3.
Подобен: Дева днесь:
Днесь лик святых земли нашея предстоит Престолу Божию/ и усердно молит Спаса нашего Бога и Заступницу Усердную:/ святителие и преподобнии покланяются,/ мученицы со исповедники ликовствуют,/ нас бо ради молят сродницы наши,/ спастися рабом Своим.
Икос:
Едема Небеснаго граждане бысте,/ приидите, почудимся подвигом святых земли нашея;/ приидите, воспоим сущия сродники, иже во граде нашем:/ тамо явишася светлыя лучи,/ сияющии паче луч солнечных житием своим,/ тамо обретеся бисер честный и многоценный,/ из негоже лик святых многих сплетеся;/ тамо подвижницы непоколебимии явишася:/ святителие древнии и многопетии,/ священномученицы во святительстве и пресвитерстем чине послужившии,/ преподобнии отцы, нам мудрии наставницы показавшиися,/ мученицы древнии и новии, венцы Небесныя удостоенныя,/ нас бо ради молят сродницы наша,/ спастися рабом Своим.
Песнь 7
Ирмос: Пламень пещный порабо́тиша благочестивии отроцы,/ тем свыше ороси я, готовы палимы по естеству,/ но паче естества мужески пояху:/ благословен еси, Господи, на престол Славы Царствия Твоего.
Отцы преподобныя земли нашея восхвалим днесь,/ сице бо подобает воспети угодники Божия,/ тесным путем шествовавших,/ духовнаго велиара победивших/ и многия иноки возрастивших.
Пророчески прорекл еси, преподобне Макарие:/ свету евангельскому подобает приити на землю нашу,/ и во многих святых возсияти!/ Темже и ныне благословением твоим пустынь Свияжская хвалится.
От юности, богомудре, Гаврииле, просветився любовию Христовою,/ суетный и многомятежный мир оставил еси./ Житие свое вверя предстательству Пречистыя Богородицы,/ слез потоки изливал еси пред пречистым Ея образом/ и теченьми их седьм езер освятил еси,/ старче наш.
Измлада Духом Святым наставляемь,/ в Седмиезерную пустынь вселился еси, преподобне отче Гаврииле,/ отонудуже многия наставляя,/ мудрый наставник монахов/ и чадолюбивый отец всем явился еси.
Чадо Господне возлюбленное, чудная Елисавето преподобномученице,/ вкупе с телесною красотою и величием княжеским/ духовною добротою украсилася еси,/ старца Гавриила советы исполняющи.
Христу последовав и славу земную презрев, преподобне отче Александре,/ во обитель Седмиезерную вселился еси,/ идеже, премудростию Божиею напитався,/ исповедник земли нашея явился еси.
Богородичен: Не имамы языка, во еже изрещи вся благодеяния Твоя, Богородительнице,/ от всяких бед и болезней свобождаемся,/ иконою Твоею укрепляеми,/ тою обитель Седмиезерная украшается.
Катавасия: Не послужиша твари богомудрии:
Песнь 8
Ирмос: Крепцы отроцы трие суще,/ силою оболкшеся Святыя Троицы,/ уловиша и победиша халдеи,/ и дивно изменися естество:/ како огнь в росу прелагашеся?/ Без туги́ я сохрани, яко пеленами./ О, пролиявый мудрость на всех делех Твоих Боже,/ Тя превозносим во веки.
Преподобномученицы Зилантовы,/ Пастыреначальнику Христу последующе,/ веру истинную, яко щит, сохранили есте / и, с любовию ближним послуживше,// даже до крове пострадали есте.
Вашу память достодолжно почитаем,/ Сергие, Лаврентие, Серафиме, Феодосие,/ Леонтие, Стефане, Георгие,/ Сергие, Иларионе, Иоанне,/ преподобномученицы святии,/ монаси Успенския обители славныя.
Адаманти избраннии Богом от земли Казанския явистеся,/ преподобномученицы Иосифе, Антоние и Сергие,/ Варлааме, Иове и Петре Раифстии,/ яко воини Христови добропобеднии.
Молитвами вашими обители земныя не оставляете,/ мученичества кровьми и постничества трудами венчаеми./ Темже и показастеся мучеников и преподобных единовсельницы,/ преподобномученицы наши.
Яко цветник духовный, обитель Богородицкую, соделали есте, отцы Раифстии,/ ныне же, предстояще Престолу Божию,/ не престайте о нас молитися.
Христа яко Небеснаго Жениха возлюбивши,/ вся красная мира сего оставила еси,/ ангельскому житию поревновала еси,/ обитель твою земную украшающи,/ паче же о горней обители помышляющи,/ Мензелинская свеще возженная, Маргарито всехвальная.
Троичен: О, Троице Честная,/ прими, яже приносит Ти земля Казанская,/ яко начатки и яко фимиам избранный,/ вся угодившия Ти и прежде, и послежде, знаемыя и незнаемыя,/ и молитвами их от всякаго вреда страну Русскую сохрани.
Богородичен: Тебе, Избранней от всех родов, Божией Матери,/ благодарственная пения приносим,/ пришествием честныя Твоея иконы, раби Твои, Богородице, озаряеми,/ но, яко имущая державу непобедимую,/ от всяких нас бед свободи, да зовем Ти:// радуйся, Невесто Неневестная.
Катавасия: Отроки благочестивыя в пещи:
Песнь 9
Ирмос: Из Едема изыде род наш прабабы ради Евы,/ призван же Тобою, рождшею нам новаго Адама — Христа,/ во двою естеству, Дево Чистая./ Взыграся Адам прадед, яко избыв первыя клятвы,/ мы же Тобою хвалящеся,/ яко Тебе ради Бога познахом, и Тебе величаем.
Приидите мучениколюбцы вси,/ духовно возвеселимся, и торжествуим:/ днесь бо предлагают трапезу тайную мученицы земли нашея,/ веселящую празднолюбцев нас, еже вопити к ним:/ радуйтеся страстотерпцы непобедимии.
Днесь, благовернии людие, сошедшеся,/ восхвалим добляго сего мученика и страдальца Авраамия,/ сей бо, укрепляемь силою Божиею,/ душу свою положи за Христа,/ много пострадав от зловерных булгар./ Сего ради от Господа венец прият/ и ныне молитвенник к Нему о нас бывает.
Страстотерпче святый Иоанне,/ блаженна земля Казанская, напившаяся крове твоея,/ Христа бо со дерзновением проповедав,/ многия муки от неверных агарян приял еси,/ страданьми своими противных дерзости низложив,/ Троицы поборник явился еси.
Отца и Сына и Святаго Духа исповедал еси, святе Петре,/ агарянское нечестивое учение,/ отметая сих не словом токмо, но и делом,/ смерть бо приял еси.
Агарянская отрасль был еси, Стефане,/ но тех неверие отметая, прилепился еси Христу,/ молитвами пресвитера Тимофея исцеление получив,/ и крещение приял еси вскоре,/ доблий страстотерпец земли нашея явился еси.
О велиции сродницы наши,/ Небеснаго Сиона достигшии/ и велию славу от Бога приимшии,/ утешение нам, в скорби сущим, испросите,/ страну нашу в благочестии утвердите/ и люди расточенныя соберите,/ от нас, яко дар, песнь благодарения приемлюще.
Богородичен: Юже поют вси земнороднии и славословят вся силы Небесныя,/ от всех верно поклоняемую,/ Заступницу Усердную рода христианскаго,/ и мы, Ю благодаряще, прославим.
Катавасия: Всяк земнородный:
Светилен святых, глас 1:
Новомученицы и исповедницы земли Казанския,/ молите о нас Всеблаженную Богородицу,/ да и мы посреде искушений и бед/ сохраним свет веры Православныя во вся дни живота нашего.
Слава, ин светилен, глас тойже:
Вкупе со святыми земли нашея хвалу вам воздадим,/ святии Феодоре, Давиде и Константине, Ярославстии чудотворцы,/ страну Казанскую и Болгарскую попечением при жизни не оставили есте,/ тако и ныне молим вы,/ почитающим память вашу заступники будите.
И ныне, Богородичен, глас тойже:
Светоносная Слова Палато,/ Ковчеже, позлащенный Духом,/ явилася еси, Пресвятая Дево,/ великия ради чистоты./ Темже молим Тя вкупе со святыми сродники нашими:/ Христу молися от страстей очистити/ православно Богородицу исповедающих Тя.
На хвалитех стихиры святых 4, глас 8.
Подобен: О, преславнаго чудесе:
О, преславнаго чудесе!/ Днесь ликует земля Казанская,/ память святых своих празднующи,/ иже духовная дарования источают обильно./ Темже, с любовию к ним возопиим:/ о, теплии молитвенницы наши ко Господу,/ испросите нам прощение согрешений/ и, яко звезды непрелестнии,// путеводите ны к Царствию Небесному.
О, преславнаго чудесе!/ Днесь ликует земля Казанская/ прославляющи святители и священномученики,/ иже в житии израстиша прекрасный плод благочестия/ и, яко ваия благоуханныя процветше,/ любовь евангельскую нам явиша./ Тех молитвами, Христе Боже,/ не отвержи нас от лица Твоего// и даруй нам мир и велию милость.
О, преславнаго чудесе!/ По тридесяти и двою летех/ в земли нетленней обретошася/ мощи Гурия святителя,/ верху мира, якоже губа носящияся./ О, каково дарование новому чудотворцу даровася!/ С прочими святыми земли своея ныне в чертозех Небесных предстоит,/ Ихже молитвами, Христе,// спаси души наша, яко Един Милосерд.
О, преславнаго чудесе!/ Днесь ликует земля Казанская/ благодатию новомученик и исповедник своих красующися,/ иже души и телеса многонедужная врачуют./ Темже и мы, духовно радующеся,/ Господа дивнаго во святых Своих прославляем:/ именовании и неименовании сродницы наша,/ на ваше предстательство надеющеся,/ Христа Бога нашего молите даровати нам велию милость.
Слава глас тойже:
Приидите вси духовне возвеселимся о памяти святых:/ се бо прииде радость велия земли нашей./ Темже во гласе радости, и чистей совести возопиим, глаголюще:/ радуйтеся, святителей сословие,/ иже Евангелие Христово граду нашему проповедавше,/ яко мрежницы, и ловцы человеков бысте,/ красны ваша ноги равноапостольныя./ Радуйтеся, мучеников собори,/ веру исповедавших даже до смерти,/ мук томления претерпевшии,/ и в годину лютую совершенне страдания венец приемшии./ Радуйтеся, преподобномученицы, отцев наслаждение,/ своя телеса пощением истаявше,/ и умертвивше страсти плотския,/ ум божественным рачением вперисте,/ исповедничеством и муками Богу угодившии,/ на Небеса возлетесте и, со ангелы водворяющеся,/ восприясте вечная благая./ Но о святители, мученицы с постницы и праведницы,/ вас Венчавшаго прилежно молите,/ избавитися от враг видимых и невидимых,/ в вере и любви совершающим присно честную память вашу.
И ныне, Богородичен, глас тойже.
Подобен: О, преславнаго чудесе:
О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.
Славословие великое. Ектении и отпуст.
На Литургии
Блаженны от канона песни 3-я и 6-я. Прокимен, глас 7: Восхвалятся преподобнии во славе,/ и возрадуются на ложах своих. Стих: Воспойте Господеви песнь нову, хваление Его в церкви преподобных. Апостол ко Евреем, зачало 334. Аллилуиа, глас 2: Священницы Твои облекутся в правду,/ и преподобнии Твои возрадуются. Стих: Бог прославляемь в совете святых. Евангелие от Иоанна, зачало 51. Причастен: Радуйтеся, праведнии, о Господе,/ правым подобает похвала.
Молитва.
К вам, святии сродницы и заступницы наши, святии вси, в земли Казанстей просиявшии, усердно ныне прибегаем и припадающе молимся: предстательством вашим теплым и милостивым не оставите нас, чад ваших, во гресех и искушениих дни своя на земли иждивающих. О, Небеснаго отечества граждане! Не забудите нас, граждан земнаго отечества вашего, и яко приснии наши ходатаицы и молитвенницы, испросите нам от Великодаровитаго Бога грехов прощения, в житии христианстем наставления и укрепления, в проповеди Евангелия Христова помощи и поспешения, да и мы трудом и подвигом вашим подражаем, о святителие наши равноапостольнии, отцы наши преподобнии и богоноснии, мученицы наши крепцыи и непобедимии. Испросите граду нашему Казани, отечеству нашему и всей вселенней мир и благословение, нам же, память вашу с любовию почитающим, благочестие в житии и в вере укрепление, в делех же благих преуспеяние, да и мы вкупе с вами и со всеми святыми, изрядно же со Усердною Заступницею рода христианскаго Пречистою Девою Богородицею, непрестанно славим и величаем пречестное и великолепое имя Живоначальныя и Божественныя Троицы, Отца и Сына и Святаго Духа, ныне и присно и во веки веков. Аминь.
СОБОР КАЗАНСКИХ СВЯТЫХ
Празднуется 4 (17) октября.
Установлен в 1984 году по инициативе епископаКазанского и Марийского). Совершается в день праздника обретения мощей святителей Гурия иВарсонофия.
Утвержден Святейшим Патриархом Московским и всея Руси Кириллом 26 января 2015 года по представлению Синодальной комиссии по канонизации святых.
Текст данной службы составлен членами богослужебной комиссии Санкт-Петербургской епархии с участием преподавателей Санкт-Петербургской Духовной Академии протоиерея Феодора Гуряка и чтеца Сергея Забавнова. Текст утверждён на Заседании Синодальной богослужебной комиссии, отправлен на утверждение в Священный Синод.
Святые, упоминаемые в текстах службы
(празднование – 4 / 17 октября)
- Сщмч. Ермоген, патриарх Московский (+1612) – память 17 февраля / 2 марта, а также 12 / 25 мая (прославление), 5 / 18 октября (Собор Московских свтт.).
- Свт. Гурий, архиепископ Казанский (+1563) – память 5 / 18 декабря, а также 4 / 17 октября (обретение мощей), 20 июня / 3 июля (перенесение мощей).
- Свт. Герман, архиепископ Казанский (+1567) – память 6 / 19 ноября, а также 25 сентября / 8 октября (перенесение мощей), 23 июня / 6 июля (второе перенесение мощей).
- Свт. Варсонофий, епископ Тверской, Казанский чудотворец (+1576) – память 11 / 24 апреля, а также 4 / 17 октября (обретение мощей).
- Сщмч. Кирилл (Смирнов), митрополит Казанский (+1937) – память 7 / 20 ноября.
- Сщмч. Анатолий (Грисюк), митрополит Одесский (+1938) – память 10 / 23 января.
- Сщмч. Иоасаф (Удалов), епископ Чистопольский, викарий Казанской епархии (+1937) – память 19 ноября / 2 декабря.
- Сщмч. Амвросий (Гудко) Свияжский, бывш. епископ Сарапульский (+1918) – память 27 июля / 9 августа.
- Сщмч. Димитрий (Шишокин), пресвитер Казанский (+1918) – память 27 сентября / 10 октября.
- Сщмч. Филарет (Великанов), пресвитер Казанский (+1918) – память 11 / 24 октября.
- Сщмч. Михаил (Вотяков), пресвитер Чистопольский (+1931) – память 5 / 18 июня.
- Мч. Авраамий Болгарский (+1229) – память 1 / 14 апреля, а также 9 / 22 марта (перенесение мощей во Владимир) и в Неделю 4-ю по Пасхе (о расслабленном).
- Мч. Иоанн Казанский (+1529) – память 24 января / 6 февраля, а также 2 / 15 октября (местное празднование памяти Казанских мучеников – день взятия Казани в 1552 г.)
- Мч. Петр Казанский (+1552) – память 24 марта / 6 апреля, а также 2 / 15 октября (местное празднование памяти Казанских мучеников – день взятия Казани в 1552 г.)
- Мч. Стефан Казанский (+1552) – память 24 марта / 6 апреля, а также 2 / 15 октября (местное празднование памяти Казанских мучеников – день взятия Казани в 1552 г.)
- Прп. Александр (Уродов) исповедник, архимандрит Седмиезерный (+1961) – память 14 / 27 августа, а также 5 / 18 сентября (обретение мощей).
- Прмчч. Зилантовы: архимандрит Сергий (Зайцев), иеромонах Лаврентий (Никитин), иеромонах Серафим (Кузьмин), иеродиакон Феодосий (Александров), монах Леонтий (Карягин), монах Стефан, послушники Георгий Тимофеев, Сергий Галин, Иларион Правдин, Иоанн Сретенский – братия Зилантова Успенского монастыря г. Казани (+1918) – память 28 августа / 10 сентября.
- Прмц. Маргарита (Гунаронуло), игумения Мензелинская (+1918) – память 9 / 22 августа.
- Свв. блгв. кнн. Феодор, Давид и Константин Ярославские чудотворцы (ΧΙV в.) – память5HYPERLINK «http://days.pravoslavie.ru/Days/mart5.htm» / 18 мартаHYPERLINK «http://days.pravoslavie.ru/Days/mart5.htm» (обретение мощейHYPERLINK «http://days.pravoslavie.ru/Days/mart5.htm» 1463 г.HYPERLINK «http://days.pravoslavie.ru/Days/mart5.htm»), 19 / 2 октября.
- Прп. Макарий Желтоводский (+1444) – память 25 июля / 7 августа.
- Сщмч. Адриан Троицкий (+1938) – память 3/16 февраля .
- Сщмч. Михаил Березин (+1938) – память 31 декабря / 13 января.
- Сщмч. Павел Дернов (+1918) – память 14 / 27 февраля.
- Сщмч. Алексий, архиепископ Омский (+1937) – память 22 августа / 4 сентября.
- Сщмч. Никита, епископ Орехово-Зуевский (+1937) – память — 6 /19 ноября.
- Прпмц. Елисавета (+1918) – память 5 / 18 июля.
- Св. прав. Иоанн Кронштадтский (+1908) – память 20 декабря / 2 января
Местночтимые святые, отсутствующие в официальном Православном церковном календаре Московского Патриархата:
- Прмчч. иеромонахи Иосиф (Гаврилов), Сергий (Гуськов), Антоний (Чирков), Варлаам (Похилюк), Иов (Протопопов) и послушник Петр (Тупицын) – насельники Раифской Богородичной пустыни Казанской епархии (+1930) – память 14 / 27 января.
(Канонизированы (местно) по благословению Святейшего Патриарха Алексия II в 1996 г.)
- Прп. Гавриил (Зырянов) Седмиезерный (+1915) – память 24 сентября / 7 октября.
(Канонизирован (местно) по благословению Святейшего Патриарха Алексия II в 1997 г.)
______________________________________________________________
Кроме того, в Казанской епархии особо почитается общецерковно прославленный святой –
Свт. Филарет (Амфитеатров; в схиме Феодосий), митрополит Киевский (+1857) – память 21 декабря / 3 января.
(Был архиепископом Казанским в 1828-1836 гг., много потрудился в деле миссии среди раскольников и иноверцев в Казанской епархии)
В утвержденный Патриархом Кириллом список Собора Казанских святых он включен не был из-за формальных критериев: в условиях частых перемещений архиереев в синодальную эпоху 8-летнее служение на Казанской кафедре признано «незначительным» по сравнению с его киевским периодом жизни. Несмотря на это, он продолжает почитаться в Казани как «свой» святой.
______________________________________________________________
В прежних версиях Месяцеслова Казанской епархии присутствовали имена таких подвижников, как:
преподобные Иона и Нектарий Казанские,
святитель Ефрем, митрополит Казанский,
архиепископ Епифаний Иерусалимский,
мученик Феодор Болгарский,
Казанские мученики Борис, Сильван, Иаков, Феодор, Василий и др.
Включение их в местные Святцы было признано ошибочным, поскольку они никогда не были официально канонизированы ни на общецерковном, ни на местном уровне, а посему их почитание как канонизированных святых и совершение в их честь богослужений (кроме заупокойных) отныне не благословляется.
